Човекот на кој Роналдо му предвидуваше голема кариера е обвинет за силување

Поранешниот португалски фудбалер и член на младинската академија на Спортинг, кој кратко настапуваше и за резервниот тим на Челси, се соочува со сериозни обвиненија. Судскиот процес треба да започне на 18 ноември.

Поранешниот португалски фудбалски талент Фабио Паим се соочува со сериозни обвиненија за силување на 20-годишна студентка, оштетување имот и неовластено влегување во стан. Според информациите од португалските медиуми, судењето треба да започне на 18 ноември.

Случајот се однесува на настан од 20 април 2023 година во градот Фаро, на југот на Португалија. Според наводите на обвинителството, Паим насилно влегол во стан во кој живееле неколку студентки. Една од нив, тогаш на возраст од околу 20 години, наводно го затекнала додека се обидувал да влезе во една од собите.

Обвинението наведува дека по нејзиното спротивставување следувал физички и сексуален напад. Истрагата вклучувала и форензичка анализа на биолошки траги пронајдени на облеката на девојката, за кои португалските медиуми објавија дека се совпаѓале со ДНК-профилот на поранешниот фудбалер.

Важно е да се нагласи дека станува збор за обвиненија за кои допрва треба да се расправа пред судот. Кривичната одговорност на Паим ќе биде утврдена во судската постапка.

Паим некогаш важеше за еден од најголемите таленти на португалскиот фудбал. Тој беше дел од младинската академија на Спортинг од Лисабон, каде што во исто време се развиваше и Кристијано Роналдо.

По заминувањето во Манчестер Јунајтед во 2003 година, Роналдо наводно изјавил: „Ако мислите дека јас сум добар, почекајте да го видите Фабио Паим“.

Очекувањата беа огромни, но Паим никогаш не успеа да го оствари потенцијалот што му се предвидуваше. За младинските репрезентации на Португалија забележа 42 настапи, но никогаш не дебитираше за сениорската селекција.

Во август 2008 година замина на позајмица во Челси, во периодот кога лондонскиот клуб го предводеше Луиз Фелипе Сколари. Сепак, во четирите месеци поминати во Англија настапуваше само за резервниот тим, без да добие шанса во првата екипа.

Подоцна кариерата ја продолжи во неколку клубови, меѓу кои и Рио Аве, но никогаш не се проби меѓу најдобрите португалски фудбалери.

По завршувањето на фудбалската кариера, Паим повторно го привлече вниманието на јавноста во 2024 година, кога стана познато дека снимил филм за возрасни.