Глорификација на Хитлер и антисемитски песни - „Торцида“ се тема на муабет

Фудбалерите на Хајдук го пречекаат Ајакс во првото коло од Лига конференцијата, но големиот европски спектакл во Сплит веќе беше засенет од скандалозното однесување на навивачите на домашниот клуб уште пред почетокот на натпреварот.

По 16 години, Хајдук се врати на европската сцена, а во Сплит владееше голема еуфорија од утринските часови. Илјадници навивачи се собраа на улиците на градот, а членовите на „Торцида“ организираа кортео кон стадионот „Пољуд“.

Како што објави Слободна Далмација, навивачите на Хајдук извикуваа антисемитски слогани: „Газете, згазете, згазете ги Евреите“, „Аушвиц, Аушвиц“ и „Стани, Адолф“, а се слушнаа и скандирања „Ајде, ајде, усташи“.

Ваквото однесување би можело да донесе сериозни проблеми за сплитскиот клуб, кој веќе може да стравува од дисциплински мерки од УЕФА, доколку инцидентите бидат предмет на постапка од страна на УЕФА.