Нов скандал на Џани Инфантино: Фатен во мултимилионска измамничка шема, не пријавил ништо

Претседателот на ФИФА, Џани Инфантино, се соочува со сè поголем притисок откако неговата грандиозна идеја поврзана со продажбата на Светското првенство доживеа спектакуларен неуспех. Речиси и да не поминува ден без да излезе на виделина нов скандал поврзан со него; сега, британскиот весник „Тајмс“ (The Times) објави нови сознанија што фрлаат сенка врз Инфантино и неговото корумпирано владеење со светскиот фудбал.

Наводно, покрај својата официјална плата, Инфантино во 2024 година добил дополнителни 1,76 милиони долари од „FWC2026 US Inc.“ – компанијата задолжена за организација на Светското првенство во САД – исплата што не била обелоденета во годишниот извештај на ФИФА.

Според официјалниот извештај, Инфантино заработил 4,27 милиони швајцарски франци во 2024 година, но споменатата сума недостасува во тие бројки.

Весникот „Тајмс“ се повикува на документи доставени од компанијата до американските даночни власти, во кои сумата од 626.229 долари е заведена како „друг вид надомест што подлежи на пријавување“. Според изворите на британскиот весник, дел од парите биле наменети за кирија за луксузна вила на Флорида – детал што е особено интересен со оглед на тоа што ФИФА отвори голем оперативен центар во Мајами пред Светското првенство.

Истите извори тврдат дека Инфантино добил слични или поголеми износи за 2025 и 2026 година, иако конкретните бројки не се обелоденети; сепак, не е исклучено тие да излезат на виделина во наредните денови, додека на површина испливуваат „скриени тајни“ поврзани со Инфантино.

Одговорот на ФИФА е дека надоместоците за раководството ги одредува поткомитет за плати и дека исплатите се пријавуваат кај американските власти во согласност со законот. Сепак, тие не објаснија зошто дополнителната исплата извршена преку американската компанија била изоставена од годишниот извештај, ниту пак ја потврдија исплатата за вилата.

Ова е уште еден скандал што го погодува Инфантино, по извештаите дека ФИФА го прикрила случајот со голманот на ДР Конго, Лионел Мпаси, за да спречи исфрлање на репрезентацијата од Светското првенство – турнир што Инфантино се обидуваше да им го продаде на Американците.